За документарниот филм „Патување пеш“ на режисерката Тамара Котевска во Битола
Документарниот филм „Патување пеш“ го следи патувањето на Амал, џиновска кукла висока 3,5 метри, млада бегалка што патува преку сириската граница во Турција, низ Европа, во обид да си најде дом. Претставува филм за детската невиност и моќта на имагинацијата во време на криза. Раскажувајќи ја одисејата на Амал, преку два континента, ја пренесува судбината на бегалците низ цел свет.
Филмот се снимаше 2 години, на територија на повеќе од 10 земји.
Во филмот учествуваат и актерите Фидаа Зидан од Палестина и Муајад Моин од Сирија, кои ја делат истата судбина како огромен број бегалци кои изгубиле сè, вклучувајќи ги своите домови и фамилии, но продолжуваат да бараат засолниште.
Европска премиера ја доживеа во конкуренција на најголемиот фестивал за човекови права, во срцето на Женева, Швајцарија – FIFDH, каде имаше 2 проекции. А светската премиера беше во Њујорк. Ова е втор долгометражен документарен филм на нашата млада режисерка Котевска и следи после големиот успех на „Медена земја“ за кој доби три големи награди на филмскиот фестивал Санденс во САД во 2019 год, а имаше и две номинации за Оскар следната 2020 година.
Главен продуцент на филмот „Патување пеш“ е една од најнаградуваните британски филмски компании со фокус на документарни филмови, Греин Медиа (GRAIN MEDIA), македонски копродуцент е ОХО Продукција, a филмот е поддржан и од македонската Агенција за филм.
По завршувањето на проекцијата ќе следи дел „прашања и одговори“ со режисерката Котевска.
Проекцијата се организира во рамките на програмата „На кино па Олабај“ – дополнителната програма на Меѓународниот фестивал на филмска камера Браќа Манаки.
Организатор: Божиновски Фондација
